රුහුණු මහා කතරගම දේවාලයට බැතිමතුන්ගෙන් ලද ආධාරවලින් ඉදිකල මහරගම අපේක්ෂා රෝහලේ සිව් මහල් ළමා වාට්ටු සංකීර්ණය අද (03) උදෑසන ජනතා අයිතියට පත් කෙරුනි.
ශ්‍රී ලංකා ගුවන් හමුදාවේ ව්‍යාපෘති කළමණාකරණය සහ ඉදිකිරිම යටතේ 2023.09.21 දින ඉදිකිරිම් ආරම්භ කළ මෙම සිව්මහල් වාට්ටු සංකීර්ණයට වැය වී ඇති මුදල රුපියල් මිලියන 150 කි. ව්‍යාපෘතිය සදහා මාස 08 ක කාලයක් වෙන් කර තිබුනි.
මෙම ගොඩනැගිල්ලේ වාස්තු විද්‍යා සැළසුම්කරණය RAPA Chartered Architects ආයතනය යටතේ නිර්මාණ ශිල්පීන් නොමිලේ තම සේවාවන් ලබාදි ඇති අතර, දෙමාපිය සහ දරුවන්ගේ මනස නිරවුල්ව තබාගත හැකි අන්දමින් එම කටයුතු සිදු කර ඇත.
කිසිදු අයෙකුගේ නමක් ගමක් නොමැතිව ‘කතරගම දෙවියන්ට පිං පිණිස’ යනුවෙන් පමණක් සමරු පලකයේ සඳහන් කිරීමට කටයුතු කර තිබු අතර, අපේක්ෂා රෝහලේ නේවාසික රෝගී දරුවන් ඇතුළු පිරිසකගේ ප්‍රධානත්වයෙන් එම වාට්ටු සංකීර්ණය විවෘත විය.
මේ අතර ඉදිරියේ දී මහල් 07 කින් යුතු ඇදන් 500 කින් සමන්විත ගොඩනැගිල්ලක් ඉදිකිරීමට සැලසුම් කර ඇති අතර, වසර 02ක් තුළ එම ගොඩනැගිල්ල සාදා නිම කිරිමට බලාපොරොත්තු වන බව රුහුණු මහා කතරගම දේවාලයේ බස්නායක නිලමේ ඩිෂාන් ගුණසේකර මහතා පවසයි.
මෙම අවස්ථාවට සෞඛ්‍ය ලේකම් විශේෂඥ වෛද්‍ය පාලිත මහීපාල, මහරගම අපේක්ෂා රෝහලේ අධ්‍යක්ෂක වෛද්‍ය අරුණ ජයසේකර, රුහුණු මහා කතරගම දේවාලයේ බස්නායක නිලමේ ඩිෂාන් ගුණසේකර මහතා ඇතුලු පිරිසක් එක්ව සිටියහ.
