කළුතර සහ කොළඹ මහාධිකරණය විසින් අද (27) පුද්ගලයින් 13 දෙනෙකුට මරණ දඬුවම නියම කර තිබේ.
කළුතර දී 2003 වසරේ මාර්තු මස 24 වනදා හෝ ඊට ආසන්න දිනයකදී පුද්ගලයෙකු තියුණු ආයුධවලින් කපා කොටා ඝාතනය කිරීමේ සිද්ධියකට අදාළව සැකකරුවන්ව සිටි 8 දෙනෙකු වරදකරුවන් කරමින් කළුතර මහාධිකරණය මරණ දඬුවම නියම කර තිබේ.
කළුතර මහාධිකරණ විනිසුරු ප්‍රදීප් අබේරත්න මහතා විසින් එම පුද්ගලයින්ට මෙලෙස මරණ දඬුවම නියම කර තිබේ.
මෙලෙස ඝාතනයට ලක්ව ඇත්තේ කළුතර දකුණ කලිල් පෙදෙසේ පදිංචිව සිටි පුද්ගලයෙකි.
මෙම සැකකරුවන් 08 දෙනාට එරෙහිව නීතිපතිවරයා විසින් මහාධිකරණය ඉදිරියේ අධිචෝදනා ගොනුකොට තිබුණි.
වසර 20 කට ආසන්න දිර්ඝ නඩු විභාගයකින් පසු මෙලෙස මරණ දඬුවම නියම කර ඇත්තේ කළුතර , මහ හීනටියංගල ප්‍රදේශයේ පදිංචි පුද්ගලයින් 08 දෙනෙකුටය.
මේ අතර ධීවර යාත්‍රාවකින් හෙරොයින් ප්‍රවාහනය කිරීම සම්බන්ධයෙන් අත්අඩංගුවට ගත් 05 දෙනෙකුට කොළඹ මහාධිකරණය විසින් අද (27) මරණ දඬුවම නියම කර තිබේ.
දීර්ඝ නඩු විභාගයකින් අනතුරුව කොළඹ මහාධිකරණ විනිසුරු නාමල් බලල්ලේ මහතා විසින් මෙම තීන්දුව ප්‍රකාශයට පත් කළේය.
2019 වසරේ දී ශ්‍රී ලංකා මුහුදු තීරය තුළ ධීවර යාත්‍රාවකින් හෙරොයින් මත්කුඩු කිලෝ ග්‍රෑම් 152 කට අධික ප්‍රමාණයක් ප්‍රවාහනය කිරීමේ චෝදනාවට මොවුන් අත්අඩංගුවට ගත්තේය.
එම මත්ද්‍රව්‍ය තොගය කිලෝ 25 බැගින් වූ මලු 08 ක බහා ධීවර යාත්‍රාව තුළ මාළු සහ අයිස් තැන්පත් කරන කුටියේ සඟවා ප්‍රවාහනය කර ඇති බව අනාවරණය විය.
රත්මලාන ප්‍රදේශයට ආසන්න මුහුදු තීරයේදී නාවික හමුදාව විසින් සිදුකළ වැටලීමකදී මෙම විත්තිකරුවන්ගේ ධීවර යාත්‍රාව ඔවුන් භාරයට ගෙන වැඩිදුර විමර්ශන සිදුකෙරිණි.
අනතුරුව නීතිපතිවරයා විසින් මෙම නඩුව අධිකරණය හමුවේ ගොනුකර ලැබූ අතර තීන්දුව ප්‍රකාශයට පත් කළ විනිසුරු නාමල් බණ්ඩාර බලල්ලේ මහතා කියා සිටියේ විත්තිකරුවන්ට එරෙහිව පැමිණිල්ල විසින් ඉදිරිපත් කළ චෝදනා සාධාරණ සැකයකින් තොරව ඔප්පු වී තිබෙන බවය.
