ග්‍රීන්ලන්ත සමාගමක්, ආක්ටික් ග්ලැසියරවලින් ලබාගන්නා අයිස් අරාබි එමීර් රාජ්‍යය වෙත අපනයනය කරන ව්‍යාපාරයක් අරඹා තිබෙන බව විදෙස් මාධ්‍ය වාර්තා කළේය.
ග්‍රීන්ලන්තයේ නූක් අගනුවර පාදක කරගනිමින් පිහිටුවාගෙන ඇති Arctic Ice නම් මෙම සමාගම ඩුබායි වෙත අළෙවිකරන ග්ලැසියර අයිස් වසර ලක්ෂයක් පමණ පැරැණි බව එම වාර්තා සඳහන් කළේය.
සමාගම සඳහන් කරන පරිදි මේ අයිස් තැනී ඇත්තේ වසර දහස් ගණනක් තිස්සේ සංකෝචනය වීමෙන් බැවින් ඒ තුළ වායු බුබුළු නැති තරම්. එනිසා ම ඒවා දිය වීමට සාමාන්‍ය අයිස් කැටයකට වඩ‌ා කාලය ගත වනවා. ලොව සුපිරි ධනවතුන් ගැවසෙන හා නොනිදන නගරයක් වන ඩුබායිහි සුරාසැල්වල මේ අයිස් රසවිඳිය හැකි බව ඔවුන් සඳහන් කරනවා.
Arctic Ice සිය වෙබ් අඩවියේ සඳහන් කර ඇත්තේ ‘ඒවා ලොව ඇති සුපිරිසිදු ම අයිස් කැට’ බවයි. ‘Arctic Ice ඵලදාව නෙළා ගන්නේ වසර ලක්ෂයකට වැඩි කලක් තිස්සේ මිදී පවතින ආක්ටික්හි ස්වභාවික ග්ලැසියරවලින්.’ සමාගම පවසනවා. ඔවුන් පවසන පරිදි එම අයිස් තට්ටු පසට හෝ මිනිසා විසින් එක් කරන ලද දූෂණකාරක සමග මුහු වී නැහැ. ‘මේ නිසා පෘථිවියේ ඇති පිරිසිදු ම H2O තනන්නේ Arctic Ice.’ සමාගම වැඩිදුරටත් ප්‍රචාරය කරනවා.
Arctic Ice සමාගමේ සම නිර්මාතෘ Malik V Rasmussen පවසන්නේ ඔහු‌ට ඩෙන්මාක් රාජධානියේ ම කොටසක් ව පවතින ග්‍රීන්ලන්තයට ආදායමක් ලැබිය හැකි නව මාර්ගයක් සොයා ගැනීමේ වුවමනාවක් පැවැති බවයි. ‘ග්‍රීන්ලන්තයේ අපි මුදල් උපයන්නේ ධීවර කර්මාන්තයෙන් සහ විදෙස් සංචාරකයන්ගෙන් පමණයි. දිගු කලක් තිස්සේ ආදායමක් ඉපයිය හැකි වෙනත් ක්‍රමයක් සෙවීමට මට වුවමනා කළා.’ Rasmussen, The Guardian වෙත සඳහන් කර තිබුණා.
දොඹකරයක් සවි කළ බෝට්ටුවක් මඟින් Nuup Kangerlua සිට ග්‍රීන්ලන්ත අගනුවර වන නූක් වෙත මෙම සුඛෝපභෝගී අයිස් රැගෙන එන ඔවුන් ඒවා නැව් නංවා එක්සත් අරාබි එමීර් රාජ්‍යය වෙත එවනවා. මේ වන විට සමාගම මෙට්‍රික් ටොන් 20ක් වූ සිය පළමු අයිස් තොගය අපනයනය කර තිබෙනවා.
කෙසේ නමුත් සමාජමාධ්‍ය හරහා ඔවුන් විවේචනයට ද බඳුන් වී තිබෙනවා. ගෝලීය උණුසුමේ ඉහළ යාමෙන් පමණක් ග්ලැසියර දිය වී යාම වේගවත් වී ඇති යුගයක ආර්ථික ප්‍රතිලාභ තකා වාණිජ්‍යමය වශයෙන් ද ග්ලැසියර කොටස් කිරීම පිළිබඳ ඇති සදාචාරාත්මක මතභේදය එයට හේතුවයි.
මේ නිසා සමාගමේ නිර්මාතෘ දෙපළට මරණ තර්ජන පවා එල්ල වෙමින් තිබෙන බවයි වාර්තා වන්නේ.
විදුසර
