පේරාදෙණිය ශික්ෂණ රෝහලේ සායනයේ සිටි පුද්ගලයකු තවත් පුද්ගලයකුට අද (28) දහවල් ඇසිඩ් ප්‍රහාරයක් එල්ල කිරීම හේතුවෙන් පස්දෙනෙකු තුවාල ලබා තිබෙන බව පොලිසිය පවසයි.
මෙම ඇසිඩ් ප්‍රහාරය එල්ලකළ පුද්ගලයා මාවනැල්ලේ පදිංචි අයකු බවට මූලික පරීක්ෂණවලින් අනාවරණය වී ඇත.
තම බිරිඳ සමග අනියම් සම්බන්ධයක් පවත්වන ලද පුද්ගලයෙකුට එම ප්‍රහාරයට එල්ලකර ඇතැයි පොලීසිය සැකකරයි.
ඇසිඩ් ප්‍රහාරයට ලක්වීමෙන් රෝහල වෙත පැමිණ සිටි කාන්තාවන් දෙදෙනෙකු හා පිරිමි පුද්ගලයින් දෙදෙනකු පේරාදෙණිය රෝහලේ හදිසි ප්‍රතිකාර ඒකකයට ඇතුළත්ව ප්‍රතිකාර ලබන බව වැඩිදුරටත් වාර්තාවේ.
ඇසිඩ් ප්‍රහාරයේ ඉලක්කය වූ පුද්ගලයාගේ ඇස්වලට හානි සිදුවී ඇති බැවින් ඔහු වැඩිදුර ප්‍රතිකාර සඳහා මහනුවර රෝහලේ අක්ෂි වෛද්‍ය ඒකකය වෙත මාරු කර යැවීමට කටයුතු කර තිබේ.
ඇසිඩ් ප්‍රහාරය එල්ල කරන ලද පුද්ගලයා රෝහලේ කාර්යමණ්ඩලය හා රෝහලේ ආරක්ෂක අංශ විසින් අල්ලාගෙන පේරාදෙණිය පොලීසිය වෙත භාරදී තිබේ.
සිද්ධිය සම්බන්ධයෙන් මහනුවර පොලීසිය වැඩිදුර විමර්ශන සිදුකරයි.
