කුරුණෑගල – පුත්තලම මාර්ගයේ වාරියපොල වේරපොල ප්‍රදේශයේදී අද (09) උදෑසන සිදුවූ රිය අනතුරකින් 08 දෙනෙකු බරපතළ තුවාල ලබා වාරියපොල දිසා රෝහලට ඇතුළු කළ බව පොලීසිය පවසයි.
අනතුර හේතුවෙන් වෑන් රථයේ පැමිණි කාන්තාවන් තිදෙනෙකු ඇතුළු හය දෙනෙක් සහ කාර් රථයේ පැමිණි යුවලක් මෙලෙස තුවාල ලබා රෝහල් ගත කර තිබේ.
කුරුණෑගල දෙසින් පැමිණි වෑන් රථයක් සහ පාදෙණිය දෙසින් පැමිණි කාර් රථයක් මුහුණට මුහුණ ගැටීමෙන් අනතුර සිදුව ඇත.
අනතුරින් බරපතළ තත්වයේ පසුවූ 07 දෙනෙකු වැඩිදුර ප්‍රථිකාර සදහා කුරුණෑගල ශික්ෂණ රෝහලට මාරුකර යවා ඇත.
වෑන් රථයේ පැමිණි පිරිස හෝමාගම ප්‍රදේශයේ පදිංචිකරුවන් පිරිසක් වන අතට කාර් රථයේ පැමිණ ඇත්තේ මහව ප්‍රදේශයේ පදිංචි යුවලකි.
වාරියපොල පොලිසියේ රථවාහන අංශය වැඩිදුර පරීක්ෂණ පවත්වයි.
