මීගහතැන්න මංසන්ධිය ප්‍රදේශයේදී වෑන් රථයක් පුද්ගලයින් 11 දෙනෙකු සමග පෙරළීගොස් අද (16) පෙරවරුවේ සිදුවු අනතුරකින් එක් කාන්තාවක් මියගොස් ඇතැයි පොලිසිය පවසයි.
මෙලෙස මියගොස් ඇත්තේ හිනිදුම පදිංචි කාන්තාවකි.
රැකියාවක් සඳහා විදේශගත වන ඥාතියෙකු කටුනායක ගුවන්තොටුපොළ වෙත ඇරලවා පැමිණෙමින් තිබූ පිරිසක් රැගත් මෙම වෑන් රථය පෙරලි ඇති බවත් ඉන් 10 දෙනෙකු තුවාල ලබා රෝහලගතකර ඇති බවත් පොලිසිය පවසයි.
මතුගම සිට හිනිදුම ප්‍රදේශය දක්වා ගමන්ගත් වෑන් රථය රියදුරුට නින්දයෑම හේතුවෙන් මාර්ගයෙන් ඉවතට පැන එලෙස පෙරළී ගොස් ඇති බව මූලික විමර්ශවලදී හෙළිවූ බව මීගහතැන්න පොලීසිය පවසයි.
සිද්ධියෙන් තුවාල ලැබූ පුද්ගලයින් මීගහතැන්න ප්‍රාදේශීය රෝහල වෙත ඇතුළත් කර තිබු අතර පසුව ඉන් කිහිපදෙනෙකු වැඩිදුර ප්‍රතිකාර සඳහා කළුතර ශික්ෂණ රෝහල වෙත මාරුකර යවා ඇත.
