ගාල්ල – මාතර ප්‍රධාන මාර්ගයේ ගාල්ල සමුද්‍ර මාවත අසල දී අද (27) රාත්‍රියේ වාහන කිහිපයක් ගැටී සිදුවූ රිය අනතුරකින් විදේශිකයන් දෙදෙනෙකු ඇතුළු 04 දෙනකු තුවාල ලබා කරාපිටිය රෝහලට ඇතුළත් කළ බව ගාල්ල පොලීසිය පවසයි
මාතර දෙස සිට ගාල්ල දෙසට පැමිණි යතුරුපැදියක් අපරික්ෂාකාරී ලෙස එකවරම දකුණට හැරවීමේදී පිටුපසින් පැමිණි තවත් යතුරුපැදියක් එහි ගැටී එය ගාල්ල සිට මාතර දෙසට ගමන් කරමින් තිබු ත්‍රීරෝද රථ දෙකක සහ නවතා තිබූ බස් රථයක ගැටී මෙම රිය අනතුර සිදුව තිබෙන බව අනාවරණය වි ඇතැයි පොලීසිය පවසයි.
රිය අනතුරත් සමග අවට සිටි පිරිස සහ පොලිසිය එක්ව වහා ක්‍රියාත්මක වී සුවසැරිය ගිලන් රථ තුනක් මගින් තුවාලකරුවන් රෝහල් ගත කිරීමට පියවර ගෙන තිබේ.
මෙම අනතුර සම්බන්ධයෙන් ගාල්ල පොලීසියේ රථවාහන අංශය පරීක්ෂණ පවත්වාගෙන යනු ලබයි.
